الدكتورة فوزية عرفات
على ما يبدو الزمن بلبنان عم يمشي لورا مش لأسباب اقتصادية او سياسية لا سمح الله بل لأسباب فضائية ولا ماورائية بحتة ويمكن بس مش متأكدة انو الاحتباس الحراري الو ايد بالموضوع, فبالوقت اللي دولة الإمارات مثلاً عم تشتري مقاعد لمواطنيها عا رحلة الى الفضاء وعم تدرس إمكانية سحب جبل جليدي من القطب الجنوبي لمكافحة التصحر وشح المياه وخفض درجات الحرارة بعدو شعب الجمهورية اللبنانية مشغول بالخبز والبنزين والكهربا والزبالة, اول شي انقطع الدولار بعدين البنزين وراها انقطع الخبز خوفي بكرا نفيق نلاقي حالنا عم نتنقل عالحمير ونرجع نسهر عا ضو اللوكس ونخبز عالتنور , وإذا ضل نهر المصاري تبعنا عم يصب بحسابات سويسرية لأشباح لبنانين رح نفيق شي نهار ونلاقي حالنا مطمورين بالزبالة وكل واحد منا في حدوا ديناصور عم يتساير معو, ولما غيرنا رح يكون مشغول بنقل عفشو عالمريخ نحن رح نكون بالمراحل الاولى لاختراع النار, وحتى بوقتا لما نرجع بدائيين وعم نمشي عالاربعة رح يكونوا معلقين الجنازير عا رقابنا وعم يفلحوا علينا بدل الحمير, بس نحن رح نضل (بدون شك) شعب لبنان العظيم وبعد ما ننقرض رح نكون نموذج ناجح للعلماء اللي رح يعملوا أبحاث علمية على جماجمنا الفاضية.